راه مدنیت: عبدالله عبدالله، رییس شورای عالی مصالحۀ ملی، در سفرش به تاجیکستان با محمدطاهر ذاکرزاده، رییس مجلس نمایندگان این کشور، دیدار کرد. آقای ذاکرزاده گفت که صلح در افغانستان به‌معنای صلح و ثبات در تاجیکستان و منطقه است.
شورای عالی مصالحۀ ملی امروز دوشنبه (۱جدی) با نشر خبرنامه‌یی گفت، در این دیدار رییس مجلس نمایندگان تاجیکستان با اعلام حمایت همه‌جانبۀ کشورش از تلاش‌های صلح افغانستان، افزود که صلح و ثبات در افغانستان را به نفع صلح، ثبات، ترقی و توسعه در منطقه می‌داند.
آقای ذاکرزاده در ادامۀ صحبت‌های خود تاکید داشت که جمهوری تاجیکستان با جمهوری اسلامی افغانستان روابط نیک و حسنه دارد و همیشه خواهان استقرار صلح و ثبات در این کشور می‌باشد.
هم‌چنین وی بر افزایش روابط پارلمانی میان دو کشور تاکید کرد و ابراز امیدواری نمود که همکاری‌ها در این زمینه افزایش یابد.
از سویی هم، آقای عبدالله، رییس شورای عالی مصالحۀ ملی، با اظهار تشکر از دعوت و حمایت مردم تاجیکستان از تلاش‌های صلح و مردم افغانستان گفت که روابط میان دو کشور استوار بر ارزش‌های تاریخی-فرهنگی دیرینه می‌باشد.
وی در این دیدار دربارۀ تلاش‌های صلح در افغانستان، مذاکرات با طالبان، نقش کشورهای منطقه در تامین صلح، سفرهای منطقهیی برای کسب اجماع منطقهیی در حمایت از صلح و نقش جمهوری تاجیکستان در تامین صلح در افغانستان به تفصیل صحبت کرد.
رییس شورای عالی مصالحۀ ملی هم‌چنان خواهان ادامه همکاری و حمایت مجلس نمایندگان و حکومت تاجیکستان از تلاش‌های افغانستان صلح گردید.
آقای عبدالله در بخش دیگر صحبت‌های خود افزود، جمهوری تاجیکستان تجربۀ خوبی در ختم جنگ داخلی و دست‌یافتن به صلح و رفاه دارد و می‌تواند افغانستان را در این راستا نیز همکاری نماید.
به تلگرام راه مدنیت بپیوندید
هم‌چنین آقای عبدالله صبح امروز برای یک سفر دو روزه وارد تاجیکستان شد و قرار است در این سفر با امام‌علی رحمان، رییس‌جمهوری، قاهر رسول‌زاده نخست‌وزیر و سراج‌الدین مهرالدین، وزیر خارجۀ جمهوری تاجیکستان، دیدار کند.
وی پیش از این نیز برای جلب حمایت‌های منطقه از روند صلح افغانستان، به پاکستان، ایران، هند، ازبیکستان و ترکیه سفر کرده و با مقام‌های این کشورها در مورد صلح و اجماع منطقهیی دیدار و گفتگو کرده بود.
