رییس کمیته دولتی امنیت ملی تاجیکستان: از مبارزه بی‌رحمانه امنیت ملی افغانستان با گروه‌های تروریستی سپاسگزاری می‌کنیم
احمدضیا سراج، سرپرست ریاست امنیت ملی در سفر دو روزه خود به تاجیکستان با سید مومن یتیم‌اف، رییس کمیته دولتی امنیت ملی تاجیکستان درباره موضوعات امنیتی گفتگو کرد.
به گزارش روزنامه راه مدنیت و به نقل از رسانه‌های تاجیکستانی؛ در این دیدار گسترش همکاری دوجانبه برای تأمین امنیت منطقه، صلح و ثبات در افغانستان و سایر مسائل مهم بررسی و درباره مبارزه مشترک با تروریسم، محافظت از مرز دولتی و جلوگیری از قاچاق مواد مخدر بحث و تبادل‌نظر شد.
مقامات امنیتی دو کشور باتوجه به تهدید مستقیم سازمان‌های تروریستی از جمله القاعده، داعش، انصارالله و حرکت اسلامی ترکستان شرقی بر همکاری‌های دوجانبه تاکید کردند.
طرف تاجیکستانی در این ملاقات از ریاست امنیت ملی افغانستان برای شناسایی و مبارزه بی‌رحمانه با گروه‌های تروریستی که با کسب آموزش‌های ویژه، دستور انجام اقدامات تروریستی در تاجیکستان را داشتند، سپاسگزاری کرد.
طرفین آمادگی خود را برای تعمیق بیشتر همکاری برای تأمین امنیت مرزهای دو کشور در مبارزه با تروریسم، افراط‌گرایی، قاچاق مواد مخدر و اسلحه اعلام کردند.
در پایان این دیدار، سرپرست ریاست امنیت ملی افغانستان با ابراز رضایت از نتایج سفر خود به تاجیکستان، از رییس کمیته دولتی امنیت ملی تاجیکستان برای سفر به کابل دعوت کرد.
